Press Release RENETIL Kongratula Kompanheiru Aderito Jesus Soares

Renetil, 22 Fevereiru 2010

• Ita kongratula dala ida tan Kompaneiru Aderito de Jesus Soares nebe simu pose ohin loron 22 fulan Fevereiru tinan 2010 iha Parlamentu Nacional, nudar Komisariu ba Komisaun Anti Korrupsaun. Aproveita okaziaun ida nee atu fo hanoin ba malu, ba membrus RENETIL hotu, kestaun interese nacional ida nee.
  
  Problema korrupsaun iha Timor-Leste kontinua bolu ita hotu nia atensaun no sadik ita nia integridade moral ka etika nudar cidadaun Timor-Leste. Kombate Korrupsaun, Promove Sustentabilidade Boa Governasaun nee intereses national ida. Ita hotu iha responsabilidade nudar cidadaun civiku atu kontribui ba alkansa interese nacional nee.
  
  Rai Timor-Leste iha potencia ba halo nia oan sira atu sai riku nebe diak. Timor-Leste nian oan hotu-hotu iha oportunidade ba sai riku tuir dalan nebe diak. Tan sa o buka riku liu husi dalan korrupsaun hodi halo foer o nia-an ho tahu dois, se dalan diak atu sai riku iha hela o nia sorin? Se iha dalan rua nebe dook hanesan deit atu ba foti buat diak ida iha Kaikoli, ida liu husi dalan kaber no maran ida seluk nani tahu dois, mak o hili fali nani liu husi tahu dois, Kompaneirus sira imi mak halo deit konkluzaun ba ema nee. Diak liu mai ita fo kbiit ba servisu kombate korrupsaun no promove sustentabilidade boa governassaun; fo hanoin ba sira nebe terlanjur nani tiha ona iha tahu dois diak liu ba haris tiha iha be mos no seluk kuidadu para labele hili fali tahu dois.
  
  Saudasoens konbativas kontra korrupssaun.
  
  J. A. J. das Neves "Samala Rua"

Sekretariu Jeral RENETIL