Komunikadu Imprensa Ba Kazu Kompaneira Lucia Lobato

KOMUNIKADU IMPRENSA

Republika Demokratika Timor-Leste nudar Nasaun foun presiza hametin sistema ne'ebe koresponde ba ejigensia hotu iha nasaun nia laran, ne'ebe fundamenta iha sistema lei no justisa. Tanba ne'e tenke prevene hahalok hotu ne'ebe kontra lei no lafavorese ba hari'i Estadu de Direitu Demokratiku hodi kontribui Dezenvolvimentu Nasional.

RENETIL (Resistensia Nasional dos Estudantes de Timor – Leste) louva atetude membru RENETIL ida ne'ebe konsistente hakruk ba lei ka desizaun Tribunal. Kompañeira Lucia Lobato, Militante RENETIL simu desizaun Tribunal hodi ba kumpri sentensa iha Komarka Gleno. Hahalok ne'e hatudu katak nia iha espiritu siviku iha Estadu de Direitu Demokratiku iha Timor-Leste. RENETIL apoiu desizaun Tribunal nian ne'ebe hatun sentensa "TINAN LIMA" ba Kompañeira Lucia Lobato ba prizaun. RENETIL apoiu maximu ba justisa ida ne'ebe ema hotu hakruk ba lei.

RENETIL lamenta no arepende ho hahalok Kompañeira Lucia Lobato ne'ebe afekta ba prosesu dezenvolvimentu nasaun Timor-Leste.

RENETIL louva desizaun Tribunal ba kazu Kompañeira Lucia Lobato ne'ebe fo sinal diak iha area dezenvolvimentu justisa iha Timor-Leste ne'ebe Timoroan rasik mak ka'er. Maibe RENETIL hein katak justisa hanesan ne'e sei halo ba ema hotu ne'ebe komete krime iha Timor-Leste. RENETIL fiar katak supremasia lei vigora duni iha Timor-Leste.

RENETIL aproveita oportunidade ida ne'e atu fo mensajen ba:

1. Membru ho Simpatizante RENETIL hotu atu ka'er metin prisipiu RENETIL nian iha Luta ba Libertasaun ba Patria no ba Povu ne'ebe konsagra iha insureisaun Politika RENETIL nian;


2. RENETIL apela mos maluk Luta Nain sira; Antigos Kombatentes da Libertasaun Nasional hotu atu partisipa ativu hodi fo kontribusaun maximu ba kombate Korupsaun, Nepotizmu no Koluzaun;


3. RENETIL mos hakarak fo mensajen ba ema hotu iha rai Timor-Leste atu hala'o kna'ar iha ida-idak nia serbisu fatin tuir konsiensia nasionalizmu no patriotizmu hodi serbi ba povu no rai doben Timor-Leste;
4. RENETIL mos apela ba Instituisaun hotu ne'ebe ka'er lei atu aplika tuir lei ne'ebe vigora iha Timor-Leste no labele halo diskriminasaun;

Farol, 2 Fevereiru 2013

R E N E T I L

Resistencia Nasional dos Estudantes de Timor-Leste

Av. Loriku No. 01 Farol, Dili-Timor Leste

Telp. +670 77104550, 77239945, 77533058;

E-mail: renetil_25anos@yahoo.com