Kongresu RENETIL ba Dala 6, Konsege Adopta Programa ba 2013-2017

19 JUL 2013  BY:REDAKSI 

Dili - Organizasaun Resistensia Nasional dos Estudante Timor Leste (RENETIL), Sesta (12/7), halao Kongresu Nasional  iha salaun eis CNRT Balide Dili.

Tema sentral kongresu Nasional organizasaun estudantes nee maka “Revitalizasaun RENETIL Nia Papel Iha Kontekstu Dezenvolvimentu Nasional”.

Liu husi Konferensia Imprensa ne’ebe halao iha sede RENETIL Farol Dili, Kinta (18/07), Sekertariu Jeral RENETIL, Demetrio do Amaral de Carvalho (Saka Onar) akompainha husi Vice Sekertariu Jeral I, Telma de Oliveira, Vice Sekertariu Jeral II, Arcenio Pereira da Silva (La’vera), no estrutura RENETIL nian hateten, kongresu  hili ona nia estrutura Conselhu Central RENETIL (CCR), konselhu ida ne’ebe kompostu husi membru 17 ne’ebe reprezenta estrutura sira iha UNER ka DIGERIN (Diresaun Geral RENETIL Indonesia), DIGAREX (Diresaun Geral RENETIL estranjeirus), DIGERTIL (Diresaun Geral RENETIL Timor Leste). Estrutura CCR ne’e rasik prezide husi Jose Amex (Siak), ho nia vice nain rua mak hanesan Virgilio Guterres (Lamukan), no Marciano.

Sekjen RENETIL ne’e hatutan, liu husi kongresu hili mós diresaun ezekutivu ne’ebe kompostu husi Sekretariu Jeral RENETIL, Demetrio do Amaral de Carvalho (Saka Onar), no nia vice nain rua mak hanesan, Telma Oliveira, no Arcenio Pereira (La’vera).

Renetil adopta mos estatutu foun ba organizasaun nee no adopta mos programa estratejiku ba 2013 to’o 2017, mak hanesan, kontrola social ka intevensaun politika, promove no dezenvolve valores kultural, solidaridade internasional, inisia sentru kultura rejistensia juventude, estratejia komunikasaun, edukasaun sidadania hodi haburas nasionalismu foun, centru estudu ba public policy, hamósu espasu ba partisipasaun membru, forma no hakbiit movimentu estudantil, fund rising no estabelese kooperativa RENETIL, hametin sentimentu partensia ba organizasaun RENETIL, lavantamentu no buka apoiu ba membru sira ne’ebe la finaliza sira nia estudu iha rejistensia nia laran.

Iha fatin hanesan mós, Vice Sekertariu Jeral I, Telma de Oliveira, hatete  RENETIL iha tempu badak sei esforsu oinsa bele kualia ho governu atu bele hare kestaun agrikultura nian. Tanba durante ne’e maske governu halo investimentu makaas iha  ba seitor agrikultura, maibe presiza hadia.

Estrutura foun Renetil sei tau ideias no  sujestaun ruma atu governu bele investe makaas iha seitor agrikultura, tanba maioria povu Timor moris iha area nee. “Ami iha komitmentu nafatin hodi kontribui no fo apoiu nafatin ba kualker governu ne’ebe kaer ukun iha Nasaun ne’e,” hatete Telma.

Nain 12 Mate Iha Tempu Luta

Iha biban nee kongresu, organizasaun nee konsege identifika nia membru nebe mate durante funu lba ibertasaun da Patria. Tuir dadus organizasaun nee nian katak, membru husi RENETIL nebe  sai vitima no mate tanba luta ba ukun rasik aan hamotuk nain 12. Saudozu hirak nee ate data seidauk hetan atensaun husi governu.

“Liu husi estrutura foun  kongresu RENETIL nee nian ami sei hato’o ba governu atu  bele konsidera ami nia maluk nebe mate tanba luta ba independensia rai nee nian,” hatete Sekertariu Jeral RENETIL, Demetrio.

Sekjer nee informa, membru Renetil nebe mate,  balun mate iha roo laran, balun mate tanba mout iha tasi,  wainhira halao kampainha. Tan nee RENETIL, hakarak  estadu rekoinese sira hanesan mos heroi da patria.

Nune’e mós, Vice Sekjen I RENETIL, Telma de Oliveira, hateten membru RENETIL ne’ebe mate, tanba luta ba ukun rasik an tanba ne’e sei kualia ho governu atu fo omenazem ba sira nebe mate.

Vice Sekertariu Jeral II, Arcenio Pereira da Silva (La’vera), hateten, Membru RENETIL  ne’ebe mate tanba ukun rasik an, RENETIL konsidera hanesan heroi Nasional, maske balun mate iha 1999, maibe ida ne’e mós konsidera hanesan heroi nasional.  “Ami mós iha tinan kotuk liu ba ami fo penghargaan ba nia familia sira, hanesan sertifikadu ruma ne’ebe hasai husi organizasaun no medalha ne’ebe hasai husi organizasaun laos husi estadu,” katak Arcenio.

Total membru RENETIL hamotuk nain 3000 resin, maibe husi rihun tolu nee ema nain 12 mak identifika mate, tanba hetan torturasaun no balun mate tanba mout iha tasi laran.  pri

Fonte http://jornal.suara-timor-lorosae.com/
kongresu-renetil-ba-dala-6-konsege-adopta-programa-ba-2013-2017/