Kongresu Hili Estrutura Foun RENETIL nian

Demetrio de Carvalho eleitu Sekretariu Jeral RENETIL

Kongresu Nasional RENETIL ba dala VI elege 5º nome Sekretariu Jeral (Sekjer) iha Renetil nia historia. Kongresu nebe hala’o durante loron tolu ramata iha domingu, 14 Julho 2013, ho eleisaun Estrutura Foun organizasaun RENETIL nian ba mandatu período tinan hat mai (2013-2017).

Kongresista sira, iha eleisaun, elege Demétrio de Carvalho nudar Sekretariu Jeral no fo-fiar ba Telma Corte Real Oliveira assume kargu Vice-sekjer RENETIL nian, nebe sei fahe servisu ho Arsenio Pereira. Iha momentum historiku ne’e, hili mos titulares ba orgaun Concelho Central de RENETIL (CCR) nebe compostu husi Presidente mak Jose AMX Goncalves no Virgilio Lamukan Guterres nudar Vice-presidente CCR hamutuk ho Oscar da Silva.

Iha plenária kongresista sira mos haksesuk no aprova Estatutu organizaun nian nebe adapta hikas ho tempu no reajusta estratégia hodi partisipa activamente iha prosesu desenvolvimento nasional.

Ho lema “Kritiku no Determinasaun ba Libertasaun Povu”, RENETIL tau a’as nafatin Nasaun no Povu nia interesse. Ba ne’e, liu husi Kongressu ba dala VI, RENETIL reafirma nia komprimisu “luta” iha kontextu “Libertasaun do Povo”, liu hosi Rekonstrusaun Nasional, hodi hetan Independensia Total no Kompleta.

Haforsa misaun organizasaun intelectual nian ne’e, Prezidente Republika, Taur Matan Ruak, sublinha iha nia diskursu abertura Kongresu RENETIL ba dala-ne’en, dehan "Imi nia misaun seidauk hotu". “Tugas” ne’e bo’ot tebes, tamba ne’e Taur husu ba membro RENETIL sira atu “kontinua halibur malu no servisu nafatin hodi liberta povu husi ki’ak no mukit”.

Lia-menon hanesan mai husi Amu Bispo Dom Ximenes Belo nebe iha aniversariu RENETIL nian ba dala XXV (20/6/2013) ho dezafiu fo hanoin ba membru ka kongresita sira katak “Afinal luta ba Ukun-Rasik-An sidauk ramata!”. Iha biban ne’e, Amu husu ba RENETIL atu sai “motor dinamizador ba sosiedade foun”, sai lutador ba kauza hanesan “korupsaun, insjustisa sosial”, sst., no sai “ajente ba dame no dezenvolvimentu” Timor Leste.

A luta (contínua) é dificil mas é nossa!

FH/AFAF, 15 Julhu 2013
www.forum-haksesuk.blogspot.com